Graad 7 is ’n belangrike oorgangsjaar – ’n brug tussen laerskool en hoërskool. Daarom word ons Graad 7’s reeds deel van die hoërskoolgroepe, sodat hulle die jaar met ondersteuning en ’n gevoel van behoort kan begin.

In hierdie fase fokus ons doelbewus op Christelike leierskap. Tieners leer hoe om gesonde en ongesonde invloede te herken, selfstandig keuses te maak en met integriteit op te tree – vaardighede wat hulle nodig gaan hê in die hoërskooljare.

Hulle sluit ook aan by ons “Wandel in die Woord”-leesprogram, wat hulle deur hul hele hoërskoolfase begelei. Só help ons hulle om ’n persoonlike verhouding met God te bou wat nie net op Sondae leef nie, maar deel word van hul alledaagse lewe.

In hierdie fase bly “Wandel in die Woord” sentraal. God se Woord is ons vertrekpunt wanneer ons die relevante temas en uitdagings in ons tieners se lewens aanspreek.

Ons begelei hulle om nie hul rigting by die wêreld te soek nie, maar by God – vir wysheid, insig en identiteit. Deur eerlike gesprekke, Bybelstudie en gebed leer hulle hoe om geloof prakties uit te leef in vriendskappe, skool en besluite.

Ons weet grootword is nie altyd maklik nie. Daarom doen ons dit saam – in ’n veilige, ondersteunende groep waar tieners kan behoort, vrae kan vra en geestelik kan groei.

In Graad 11 fokus ons doelbewus op die verdieping en verwoording van elke tiener se persoonlike geloof. Hierdie jaar skep ruimte vir eerlike gesprekke waar hulle hul eie verstaan van God en hul geloof kan verwoord en deurdink.

Ons begelei hulle om die kern van hul belydenis prakties uit te leef – deur vertroue in God se verlossing, getrouheid aan Sy Woord, betrokkenheid by die gemeente en ondersteuning van die kerkfamilie.

Belydenisaflegging is dan nie net ’n eenmalige gebeurtenis nie, maar ’n bevestiging van wat reeds deur die jaar gegroei en geleef is – ’n betekenisvolle mylpaal in hul geloofsreis.